ഫെഡററെ ഞെട്ടിച്ച് ഇന്ത്യൻ താരം സുമിത് നാഗല്‍

ടെന്നീസ് ഇതിഹാസം റോജര്‍ ഫെഡററോട് തോറ്റ് പുറത്തായെങ്കിലും സുമിത് നാഗലിന് ഇന്ത്യക്കാരുടെ കയ്യടി. റോജര്‍ ഫെഡററിനോട് മത്സരിച്ച്‌ ഒരു സെറ്റ് നേടുന്ന ആദ്യ ഇന്ത്യന്‍ താരം എന്ന റെക്കോര്‍ഡാണ് ഇന്ത്യയുടെ സുമിത് നാഗല്‍ ഇന്ന് സ്വന്തമാക്കിയത്. ഒരു സമയത്ത് ഫെഡറര്‍ അട്ടിമറിക്കപ്പെടും എന്ന് പോലും കായിക പ്രേമികള്‍ക്ക് തോന്നിയിടത്താണ് സുമിത് ഗോയല്‍ ഇന്ത്യയുടെ വലിയ പ്രതീക്ഷയാകുകയാണ്.

യുഎസ് ഓപ്പണ്‍ ടെന്നീസിലാണ് ഇന്ത്യന്‍ താരം സുമിത് നാഗല്‍ റോജര്‍ ഫെഡററിനെതിരെ മികച്ച പോരാട്ടം കാഴ്ചവച്ചത്. ടൂര്‍ണമെന്റില്‍ പങ്കെടുക്കാന്‍ ആദ്യമായാണ് സുമിതിന് അവസരം ലഭിച്ചത്. റോജര്‍ ഫെഡറര്‍ക്കെതിരെ ആദ്യ മത്സരം കളിക്കാനിറങ്ങിയ സുമിത് ആദ്യ സെറ്റ് സ്വന്തമാക്കി എല്ലാവരെയും ഞെട്ടിക്കുകയും ചെയ്തു. സ്‌കോര്‍ 4-6, 6-1, 6-2, 6-4. ആദ്യ സെറ്റില്‍ 2-0 എന്ന നിലയില്‍ പിന്നിലായശേഷമാണ് 6-4ന് സുമിത് സെറ്റ് സ്വന്തമാക്കുന്നത്.

നാഗലിനെതിരെ ജയിച്ചെങ്കിലും ഇന്ത്യന്‍ യുവതാരത്തിന്റെ പോരാട്ട വീര്യത്തെ പ്രകീര്‍ത്തിക്കാന്‍ സ്വിസ് ഇതിഹാസ താരം റോജര്‍ ഫെഡറര്‍ മടിച്ചില്ല.