'400 ഗ്രാം കഞ്ചാവാണ് അന്ന് പിടിച്ചത്, മുപ്പത് പോലീസുകാർ ഹരാസ് ചെയ്ത് ചോദ്യം ചെയ്യുകയായിരുന്നു'; തുറന്നുപറഞ്ഞ് ശോഭ വിശ്വനാഥ്
പ്രശസ്ത ഫാഷന്‍ ഡിസൈനറും സംരഭകയുമാണ് ശോഭ വിശ്വനാഥ്. വീവേഴ്‌സ് വില്ലേജ് എന്ന സ്ഥാപനത്തിന്റെ ഉടമയാണ് ശോഭ. 2021ല്‍ ശോഭയുടെ സ്ഥാനപത്തില്‍ നിന്നും കഞ്ചാവ് പിടിച്ചതുമായി ബന്ധപ്പെട്ട വലിയ വിവാദങ്ങള്‍ ഉണ്ടായിരുന്നു. എന്നാല്‍ കൃത്യമായ തെളിവുകളോടെ തന്റെ സ്ഥാപനത്തില്‍ കഞ്ചാവ് വച്ചയാളെ ശോഭ കണ്ടെത്തുകയായിരുന്നു. പിന്നീട് ബിഗ് ബോസിലൂടെ പ്രേക്ഷകർ ശോഭയെ അടുത്തറിയുകയുണ്ടായി. ഇപ്പോഴിതാ തന്റെ സ്ഥാപനത്തിൽ നിന്നും കഞ്ചാവ് പിടിച്ചതുമായി ബന്ധപ്പെട്ട് ഉണ്ടായ വിവാദങ്ങളെ കുറിച്ച് സംസാരിക്കുകയാണ് ശോഭ വിശ്വനാഥ്.
സ്ഥാപനത്തിലെ മുൻ ജീവനക്കാരും തന്നോട് പ്രൊപോസൽ നടത്തിയ ഒരു വ്യക്തിയും ചേർന്നാണ് ഇത് ചെയ്തതെന്നാണ് ശോഭ പറയുന്നത്. 400 ഗ്രാം കഞ്ചാവ് അന്ന് പിടിച്ചുവെന്നും അതിന് ശേഷം പോലീസുകാർ വളരെ മോശം രീതിയിലാണ് തന്നോട് പെരുമാറിയതെന്നും ശോഭ പറയുന്നു. 2021 ജനുവരി 12നാണ് സംഭവം നടക്കുന്നത്. ക്രാഫ്റ്റ് വില്ലേജിന് അകത്ത് മഫ്തിയിൽ രണ്ട് പോലീസുകാർ വന്നു തന്റെ ഫോൺ വാങ്ങിയെന്നും തന്നെ ഹരാസ് ചെയ്യുന്ന തരത്തിൽ ചോദ്യം ചെയ്യാൻ ആരംഭിച്ചുവെന്നും ശോഭ പറയുന്നു.
"എന്ത് തരം ബിസിനസാണ് ചെയ്യുന്നത്, എന്ന് തുടങ്ങി ഈ പരിപാടികൾ എന്നൊക്കെയായിരുന്നു ചോദ്യങ്ങൾ. കാര്യമെന്താണെന്ന ക്ലാരിറ്റി അവർ എനിക്ക് തന്നിരുന്നില്ല. ഉടൻ തന്നെ എന്നെ അവിടെ നിന്ന് പഴയ സ്റ്റോറിലേക്ക് കൊണ്ടുപോയി. പോലീസ് ജീപ്പിൽ കയറാൻ വിസമ്മതിച്ചപ്പോൾ എന്റെ വണ്ടി അവർ ഓടിച്ചു. അതിൽ ഞാൻ കയറി. ഈ സംഭവങ്ങൾ എല്ലാം നടക്കുമ്പോൾ എന്റെ ആദ്യ ചിന്ത പോയത് വയസായ അച്ഛനിലേക്കും അമ്മയിലേക്കുമാണ്. ഈ ന്യൂസ് അറിഞ്ഞ് കഴിയുമ്പോൾ അവർക്ക് എന്താണ് സംഭവിക്കുക എന്ന വേവലാതിയായിരുന്നു എനിക്ക്. അവർക്ക് എന്തെങ്കിലും സംഭവിച്ചാൽ ഞാൻ ഉണ്ടാവില്ലെന്നും നിങ്ങളെ വെറുതെ വിടില്ലെന്നും അപ്പോൾ തന്നെ ഞാൻ പോലീസുകാരോട് പറഞ്ഞു. പിന്നീട് എനിക്ക് മനസിലായി ഞാൻ പെട്ടിരിക്കുന്നത് വളരെ സീരിയസായ കാര്യത്തിലാണെന്ന്. ഞാൻ പഴയ സ്റ്റോറിലേക്ക് എത്തിയപ്പോൾ മുപ്പതോളം പോലീസുകാർ അവിടെ ഉണ്ടായിരുന്നു. എന്നെ ട്രാപ്പ് ചെയ്തതായിരുന്നു." ശോഭ പറയുന്നു.