ടോപ് ട്രെൻഡിങ് വീഡിയോ; ഡിസ്ലൈക്കുകളുടെ പ്രളയം
ഒമര്‍ ലുലു ചിത്രമായ അഡാര്‍ ലവിലെ രണ്ടാമത്ത പാട്ടും തരംഗമാവുകയാണ്. ഇത്തവണ പക്ഷെ വീഡിയോക്ക് ലഭിച്ച ഡിസ്ലൈക്കുകളുടെ എണ്ണം കൊണ്ടാണ് ഗാനം സൂപ്പർ ഹിറ്റായതെന്ന് മാത്രം. റിലീസ് ചെയ്ത് ഈ നേരം കൊണ്ട് ‘എടി പെണ്ണേ ഫ്രീക്ക പെണ്ണേ’ എന്ന ഗാനം വാരിക്കൂട്ടിയത് 3 ലക്ഷത്തിലധികം ഡിസ്ലൈക്കുകളാണ്. ലൈക്കുകൾ 35,000 എണ്ണവും. ഡിസ്ലൈക്കുകളുടെ എണ്ണം കൂടുന്നുണ്ടെങ്കിലും യുട്യൂബ് ട്രെന്‍ഡിങ്ങില്‍ ഒന്നാമതാണ് ഗാനം
സിനിമയിലെ പ്രധാന കഥാപാത്രങ്ങളായ പ്രിയ പ്രകാശ് വാര്യര്‍, നൂറിന്‍, റോഷൻ തുടങ്ങിയവർ പാട്ടിലുണ്ട്. ഷാന്‍ റഹ്മാനാണ് സംഗീത സംവിധാനം നിര്‍വഹിച്ചിരിക്കുന്നത്. അതേസമയം ചിത്രത്തിന്‍റെ ഡിസ്ലൈക്കിന് നന്ദി പറയുകയാണ് അഡാറ് ലവ് ടീം. ഡിസ്ലൈക്ക് ആണെങ്കിലും ഗാനത്തോട് പ്രതികരിച്ചതിന് നന്ദിയറിയിക്കുകയാണെന്ന് സംവിധായകന്‍ ഒമര്‍ ലുലുവും കൂട്ടരും ഫേസ്ബുക്ക് ലൈവില്‍ പറഞ്ഞു.
ചിത്രത്തിലെ മാണിക്യമലരായ ബീവി എന്നു തുടങ്ങുന്ന ഗാനം ഓണ്‍ലൈന്‍ ചരിത്രത്തില്‍ പുതിയ റെക്കോര്‍ഡുകള്‍ കുറിച്ചിരുന്നു. ഗാനത്തിലെ ഒരു രംഗത്തിലെ കണ്ണിറുക്കല്‍ സീനിലൂടെ പ്രിയ വാര്യര്‍ എന്ന പുതിയ താരോദയവും ഉണ്ടായി. മാത്രമല്ല പ്രിയ വാര്യര്‍ക്കെതിരെ സോഷ്യല്‍ മീഡിയയില്‍ വ്യാപകമായ രീതിയിൽ ട്രോളുകൾ വന്നിരുന്നു.
