ആരാധകരെ ആവേശത്തിലാഴ്ത്തി ലൂസിഫറിന്റെ ഒഫീഷ്യല്‍ ട്രെയ്‌ലര്‍
മലയാളി സിനിമാ പ്രേമികള്‍ പ്രതീക്ഷയോടെ കാത്തിരിക്കുന്ന പൃഥ്വിരാജിന്റെ കന്നി സംവിധാന സംരംഭമായ ലൂസിഫറിന്റെ ട്രെയിലര്‍ പുറത്ത്. മോഹന്‍ലാല്‍ നായക കഥാപാത്രത്തെ അവതരിപ്പിക്കുന്ന ചിത്രം ഒരു സംഭവബഹുലമായ രാഷ്ട്രീയ കഥയാണ് പറയുന്നതെന്ന് ട്രെയിലറില്‍ നിന്ന് വ്യക്തമായിരിക്കുകയാണ്.
ഇത് തിന്മയും തിന്മയും തമ്മിലുള്ള യുദ്ധമെന്ന വിശേഷണത്തോടെ മോഹന്‍ലാലിന്‍റെ ഒരു നെഗറ്റീവ് ഷേഡുള്ള കഥാപാത്രമാകും ലൂസിഫറിലേതെന്നും സംവിധായകന്‍ സൂചന നല്‍കുന്നുണ്ട്. പൃഥ്വിരാജിന്റെ ആദ്യ സംവിധാന സംരംഭം, നായകനാവുന്നത് മോഹന്‍ലാല്‍, തിരക്കഥയൊരുക്കുന്നത് മുരളി ഗോപി..
ഇത്തരത്തില്‍ പല ഘടകങ്ങളാല്‍ പ്രേക്ഷകരില്‍ ആവേശമുണര്‍ത്തിയ ചിത്രമാണ് ലൂസിഫര്‍. 28ന് തീയേറ്ററുകളിലെത്തുന്ന ചിത്രത്തിന്റെ പ്രമേയത്തെക്കുറിച്ച് ഇപ്പോഴും അധികം വിവരങ്ങളൊന്നും സംവിധായകനോ തിരക്കഥാകൃത്തോ പുറത്തുവിട്ടിട്ടില്ല.
ചുരുക്കം വാക്കുകളിലാണ് പൃഥ്വിയും മോഹന്‍ലാലും മുരളി ഗോപിയുമൊക്കെ ഇതുവരെ ലൂസിഫറിനെക്കുറിച്ച് സംസാരിച്ചിരിക്കുന്നത്. വിവേക് ഒബ്റോയ് ആണ് ചിത്രത്തില്‍ പ്രതിനായക കഥാപാത്രത്തെ അവതരിപ്പിക്കുന്നത്.
പൊളിറ്റിക്കല്‍ ത്രില്ലര്‍ ഗണത്തില്‍ പെടുത്താവുന്ന ചിത്രത്തില്‍ മോഹന്‍ലാല്‍ കഥാപാത്രത്തിന്റെ സഹായിയായി കലാഭവന്‍ ഷാജോണ്‍ എത്തുന്നു. മഞ്ജു വാര്യര്‍, ഇന്ദ്രജിത്ത്, ടൊവീനോ തോമസ്, സംവിധായകന്‍ ഫാസില്‍, മംമ്ത മോഹന്‍ദാസ്, ജോണ്‍ വിജയ് എന്നിങ്ങനെ വലിയ താരനിരയുണ്ട് ചിത്രത്തില്‍. സുജിത്ത് വാസുദേവ് ആണ് ഛായാഗ്രഹണം. സംഗീതം ദീപക് ദേവ്.
