റെക്കോർഡുകൾ പഴങ്കഥകളാക്കി കുതിക്കുകയാണ് വിരാട് കോഹ്ലി

റെക്കോർഡുകൾ ഒന്നൊന്നായി മറികടന്ന് കുതിപ്പ് തുടർന്നുകൊണ്ടിരിക്കുകയാണ് ഇന്ത്യൻ ക്രിക്കറ്റ് ക്യാപ്റ്റൻ വിരാട് കോലി. റെക്കോർഡുകൾ മാത്രമല്ല കൂടെ ബ്രാൻഡ് മൂല്യവും.

വിൻഡീസിനെതിരായ രണ്ടാം ഏകദിനത്തിൽ, ഏറ്റവും വേഗത്തിൽ പതിനായിരം റൺസ് നേടുന്ന ക്രിക്കറ്റ് താരമെന്ന സച്ചിൻ ടെണ്ടുൽക്കറുടെ റെക്കോർഡ് കോലി മറികടന്നു. 10,000 റൺസ് നേടാൻ സച്ചിൻ 259 ഇന്നിങ്സ് കളിച്ചപ്പോൾ കോലി കേവലം 205 ഇന്നിങ്സിൽ ഈ നാഴികക്കല്ല് പിന്നിട്ടു.

ഇതോടെ ‘ബ്രാൻഡ്’ വിരാട് കോലിയുടെ മൂല്യവും വർധിച്ചു. ഇപ്പോൾത്തന്നെ, പരസ്യങ്ങളിൽ പ്രത്യക്ഷപ്പെടുന്നതിന് ഒരു ദിവസം കോലിയുടെ പ്രതിഫലം അഞ്ച് കോടി രൂപയാണ്. ഇനിയും മൂല്യം ഉയരാനാണ് സാധ്യത.